Ananta G

Kalayan Rohman miwah Rohim, kuring gumelar di alam dunya. Tina rahim sang Drupadi, garwa para Pandawa. Taya haleuang adzan, taya hariring ayun ambing. Ukur pameunteu-pameunteu pinuh tanda tanya "Ieu anak saha?" rohangan tempat ngalahirkeun beuki harénghéng ku sora silih tuduh, sabab pada-pada mungkir, pada-pada nyingkur tina haténa.

"Rama!" cék kuring ka Yudistira, ngadon ngabalieur. Bima, Arjuna, Nakula Sadéwa Pon kitu deui. Berebet kuring lumpat, muru kamar panyileukan laju muru eunteung, diilikan luhur handap luar jero, saha ari diri. Bet lapur teu katimu, teu kapuluk. Nu kapanggih ukur sesemplakan-sesemplakan nu kudu diterapkeun hiji hiji.

Enya! Bapa Aing Yudistira, nu babari ngalajur nafsu, nandonkeun sagalana. Nu perfeksionis, Tai ucing. Atawa Bima? Nu can kungsi salah ucap, saciduh metu. Can kungsi ingkar duméh oray geus ngabeulit beuheungna? Ah..lain, kuring mah sok ngabohong, sok ingkar tina jangji. Boa Arjuna? Nu Sipat rayunganna netes ka kuring, atawa nakula Sadéwa nu teu bisa mandiri?

Ibu pernah ngageri hiji waktu "Ieu mah dosa Ibu, Anaking, Dosa Ibu". Tapi naon? Naon dosa Ibu? nepi ka Pandawa bet meupeus keuyang ka kami? Ibu can kungsi salingkuh, can kungsi ngarempak jangji. Can kungsi rumahuh najan Pandawa Kurawa ngocorkeun getih beureum di Padang Kurusetra. Tapi Ibu dareuda nyarios "Ibu téh geus ngeuceuykeun raray Pandawa, Anaking. Ibu hina, sataranjang hareupeun balaréa. Tuluy ibu kedal sumpah nu teu pipanteseun, moal digelung méméh diangir ku getih Dursasana! Ibu ngalajur nafsu, ari kitu mah, naon bédana Ibu jeung Dursasana?"

Tapi naon bédana jeung Pandawa?

Pandawa sotéh cék putra Déstarata, Kurawa sotéh cék turunan Pandu. Duh Gusti, naha bangbaluh kami téh sarua jeung rumahuhna Emang Dipati Karna baheula? Nu teu puguh saha indung nya Bapa? Tapi ramana, Batara Surya kapan nangtayungan, méré welas asih ka Karna.

Mun kitu mah nu dosana téh Ibu? Enya Ibu, tapi naha nu katempuhanana bet kudu anakna. "Yeuh, Bu. Kami mah teu mais teu meuleum." Ibu cireumbayan, tuluy ngagabrug "Hampura Ibu, Hampura Ibu. Demi langit jeung Bumi, anjeun téh putra Ibu."

"Terus, naon gunana Ibu bakti tuluy ka Pandawa, nu geus nganiaya, geus miceun?"

"Anaking, asih téh sok sanajan, lain kusabab!"

"Eh, maksudna, sanajan ibu dikaniaya, dihina, ibu tetep bakti Asih? Hébat, Ibu hébat. Tapi bu, maranéhanana mah geuning teu mikaasih Ibu. Asih manéhna mah lain sok sanajan, tapi kusabab?"

"Kusabab naon anaking?"

"Enya, kusabab hayang nyumponan kabutuhan birahina" Plak, Ibu nampiling.

"Teu pantes putra Ibu nyarios kitu."

Teu Bu, mémang teu pantes putra nyarios kitu ka Ibuna, jiga Guruminda nu teu wasa neuteup pameunteu ibuna. Jiga sangkuriang nu teu meunang deudeuh ka indungna. Tapi Ibu kaliwat sampurna, kageulisan Ibu mapakan bidadari langit.

"Peun, anaking, nyeri, nyeri haté Ibu."

"Saha Bu, saha nu geus nyerihatékeun Ibu? Pandawa? Saupama kitu Kami Sumpah, moal rék diparas saacan diangir ku getih para Pandawa. Jiga sumpah-sumpah sumpah Ibu dina abad-abad nu kaliwat, jiga sumpah Ibu dina abad-abad nu bakal datang.

Calageur? Béjana geus halodo deui nya? Keun waé, anggap wé cocoba ti nu kawasa. Teu di ditu teu di dieu kétah kituna mah. Kamari ogé, basa naék angkot Caheum Lédeng, supir angkot Urang Batak bet sesengor ka penumpang, teu pira kurang ongkosna lima ratus pérak. Cuaca panas kawas kieu mah mémang uteuk téh babari ngahéab euy, babari ngagolak. Méh sapaparat deudeuleuan kituna téh. Di jalan, di terminal, di kampus, nepi ka di masjid jalma-jalma nu ngaranna manusa téh leuwih resep néangan sparing partner. Jigana Aa Gym can bisa dibilang suksés ngamanajemen nafsu, copélna ngawulangkeun cara ngokolakeun nafsu.

Kuring sorangan ogé sakapeung mah sok ngarasa keueung, ningali situasi sabudeureun kampus urang nu cenah mah Ilmiah, Edukatif, jeung Religius (bari ayeuna mah dibungbuan PELUNG "Pelopor dan Unggul"). Lain sieun ningali Slogan nu sakitu sampurnana (ceuk nu nyieunna), tapi sieun ku beurit nu ngagorogotan Slogan nepi ka rangsakna. Ceuk Gunawan Moehamad mah cenah jargon téh sajak raksasa, nu boga wiwaha, boga harisma. Tapi nyatana mah teu salawasna kitu geuning, sajak raksasa téh samalah katingali cébol kusabab teu napak ka lemah. Urang bayangkeun waé Slogan téh raksasa, slogan UPI téh agréng lir gedung JICA, tapi, saupama urang nyawangna ti awang-awang mah nu katémbongna téh nya cébol téa.

Kabuktian jigana, taar jeung tuur mimindengna kalah teu rempeg. Ceuk taar kulon ceuk tuur wétan, ceuk taar: "Budayakeun transparansi!", ceuk tuur: "Samunikeun tarasi!", ceuk taar "Prestasi", ceuk tuur "Prustasi".

Ana geus kajadian kitu, teu perlu évaluasi, teu perlu otokritik, teu perlu nilik diri, teu kudu hésé-hésé néangan jalan geusan ropéaneun jaga, karudet-rudet. Téangan cara nu pang-praktisna: "Murang-maring". Ieu cara kawilang paling éféktif dina pakumbuhan masyarakat modérn. Ku murang-maring mah urang teu perlu nyaliksik naon nu kudu dioméan, urang teu perlu réa teuing dédéngéan, kari néangan buntut méong, teumbleuhkeun ka nu keur teu mais teu meuleum, timpah wéh satakerna, jelebét...sakali dua kali, dijamin...tumpur!

Baheula basa LDKM, inget kénéh nepi ka ayeuna kasauran lanceuk urang yén: cingcirining jalma nu teu bisa ngungkulan pasualan téh nya éta jalma nu kabisana "Murang-Maring" téa.

Ké..ké..ké, teuing Bandung, teuing Jakarta, teuing Indonésia jigana keur ngusung téma nu sarua. Tingali wé spanduk di gedung DPRD "Biarkan méréka Teriak, Warga Bandung Pasti mendukung Perda K-3" atawa di panorama aya spanduk pulas bodas dipilok hideung "Kami Warga Bandung Anti Komunis!" atawa di gigireun masjid Lédeng aya papan ditulisan "Hanya Anjing yang kencing disini!". Béda warna, béda rupa, tapi sapasemon: "Ambek".

Saheulaanan, MC'Donald, KFC, Hoka-hoka Bénto, Roko, Produk éléktronik Jepang marulas diri néangan simpati, masang spanduk dihadé-hadé, bari jeung mikiran naon nu dipikabutuh masyarakat. Maranéhanana gulak-gilek, angkat ngagandeuang bari nanggahkeun gado salsé pisan. Taya keureutan kaweur atawa tagiwur, taya keureutan "Murang-maring". Ku sabab sagala rupana geus diitung ti anggalna. Kabutuhan masarakat jiga kumaha, Iklan naon nu loyog keur produkna, saha modél iklan nu rék dipakéna, nepi ka nyadiakeun customer service pikeun ngalayanan konsumén nu pada ngangluh sabab eusi produkna teu saménor cangkangna. Pamustunganana, rék hargana salaput hulu ogé (jiga SPP JK), keukeuh wé konsumén téh pada meuli, da kataji ku iklan nu aya awéwé geulisan bari ngiceupan.

Ari UPI? Duka tah...Ayeuna mah jigana kari milih baé. Naha rék murang-maring jiga spanduk sabudeureun Bandung, naha rék dangdan mulas awak jiga produk-produk luar negri? Ngan nu pasti, mun kuring dititah milih mah, mending nyieun spanduk sorangan: "Aku Belum Siap menjadi BHMN". Cag!

Ledeng, Halodo 2007

Sinom

Kumbakarna Gugur

kembana Sang Kumbakarna

kembangna kananga sari

nu tandang tibang keur kandang

nu tanding lain deuk nyanding

mungguh tinimbangan ati

citangis tinangtu juuh

tan musuh tan jugjugan

nawaétu béla nagri

Kumbakarna katilas teu keur sasaha